ტუალეტი გაიჭედა — 5 ნაბიჯი, სანამ სანტექნიკოსს დაურეკავთ

უნიტაზში წყალი აღარ ჩადის და ავსებს. პირველი რეაქცია ჩვეულებრივ ორია: ან კიდევ ერთხელ ჩამორეცხვა, ან ქიმიის ჩასხმა. ორივე ხშირად აუარესებს მდგომარეობას. ქვემოთ ის ნაბიჯებია, რომლებიც უსაფრთხოა და რეალურად მუშაობს.

1. შეწყვიტეთ ჩამორეცხვა

ყოველი ჩამორეცხვა ბაჩკიდან 6-9 ლიტრს უშვებს. თუ მილი გაჭედილია, ეს წყალი ვერსად წავა — უნიტაზი ავსებს და იატაკზე გადმოდის. თუ ბაჩკა უკვე ივსება, დახურეთ მისი ონკანი (ჩვეულებრივ უნიტაზის უკან, კედელთან).

2. დაელოდეთ 15-20 წუთს

თუ გაჭედვა რბილია — ქაღალდი, ჰიგიენური საშუალება — წყლის სვეტის წნევა მას ხშირად თავისით წაატანს. ეს უფასო ნაბიჯია და საკმაოდ ხშირად საკმარისიც.

3. სცადეთ ვანტუზი, სწორად

ვანტუზი წნევით მუშაობს და არა ძალით. მნიშვნელოვანია:

• უნიტაზში წყალი იმდენი უნდა იყოს, რომ ვანტუზის რეზინა მთლიანად დაიფაროს — თუ არა, სცადეთ წყლის დამატება ვედროთი;
• პირველი მოძრაობა ნელი უნდა იყოს, რომ ჰაერი გამოვიდეს, შემდეგ 10-15 მკვეთრი მოძრაობა;
• ბოლოს მკვეთრად აწიეთ — სწორედ უკუდარტყმა შლის ხოლმე გაჭედვას.

4. არ ჩაასხათ ქიმია

ეს ყველაზე მნიშვნელოვანი „არ” არის. თუ წყალი საერთოდ არ ჩადის, ქიმიური საშუალება უნიტაზში დგება და არსად მიდის. შედეგად:

• ის აღარ მოქმედებს, რადგან გაჭედვამდე ვერ აღწევს;
• ძველ ჩუგუნის მილს კოროზიით აზიანებს;
• და როცა სპეციალისტი მოვა, მას უკვე აგრესიულ სითხეში მოუწევს მუშაობა.

5. შეამოწმეთ, მარტო ტუალეტია თუ ყველაფერი

ეს ერთი შემოწმება განსაზღვრავს, რამდენად სერიოზულია პრობლემა. გახსენით აბაზანის და სამზარეულოს ონკანი და დააკვირდით:

• მხოლოდ უნიტაზი არ ჩადის — გაჭედვა ლოკალურია, უნიტაზთან ახლოს;
• აბაზანა და რაკოვინაც ნელა ჩადის ან ხმაურობს — გაჭედვა უფრო ღრმად, საერთო მილშია;
• სარდაფში ან ქვედა სართულზე წყალი ამოვიდა — საერთო სტოიაკია გაჭედილი და ეს უკვე სასწრაფოა, რადგან წყალი მეზობლებთან წავა.

როდის აღარ ღირს ცდა

დაურეკეთ სპეციალისტს, თუ:

• ვანტუზის შემდეგ ორ-სამ ცდაზე შედეგი არ არის;
• წყალი სხვა წერტილიდანაც ამოდის — ეს ნიშნავს, რომ გაჭედვა საერთო მილშია;
• სუნი დგას სარდაფში ან ეზოში;
• პრობლემა თვეში რამდენჯერმე მეორდება — ეს ნადებია და არა შემთხვევითი საგანი. ასეთ დროს ტროსი მხოლოდ ხვრელს გააკეთებს, მილი კი დავიწროებული დარჩება.